صراع القلب والعقل
اصحى ياقلبى وفوق............ دا الامر عليك اختلط
دى ناس عالغدر عايشه .........وقلوبهم للعرض فقط
لازم تشطب عليهم............... وترسم علامه غلط
دى كانت واحده وخاينه...... وصفحه خلاص وانطوت
ويرد قلبى العليل:؟؟
ساكت ياصاحبى وراضى....... واصبحت كما الحجر
هزيل. مريض. تعبان........ وعايش فى حاله خطر
واول ما قالت حبيبى........... بركان جوايه انفجر
ايه يعنى جرحنى مره........... مادام رجع واعتذر
ويرد عقلى الحكيم:؟؟
عمر اللى حب مايغدر واسفها مش مقبول
ايه يعنى قالت بحبك؟؟ مالك كده مذهول
ارجع ياقلبى لرشدك لحسن تموت مقتول
انت ملكى انا... وهتمشى ذى ما اقول
افضلى اموت بكرامه احسن ما اعيش مذلول
وفى النهايه اهدى هذه القصيده الى حبيبى وصديقى (محمد الحداد) وقوله يارب نفضل احباب ويارب القصيده تعجبك
posted by الســـاحر @ Wednesday, September 20, 2006
37 Comments:
يااااه كنت مخبيها فين؟ ايه الصراع القوى دا...حسيت فعلا ان فيه اتنين قاعدين بيتكلموا والمشاده بينهم مثيره...ياعينى لما القلب اول ما قالت حبيبى بركان جوايه انفجر...هو دا فعلا كلام القلب لما يحب بقوه...ولما رد عليه العقل وقال ارجع يا قلبى لرشدك لحسن تموت مقتول افضل اموت بكرامه ولا انى اعيش مذلول...هايله هايله هايله هايله هايله هايله هايله هايله..حاسس انها حاجه من حاجات صلاح جاهين وعلى نفس المستوى..بس ياريت تقولنا ايه نتجة اخر جوله ومين اللى فاز بالضربه القاضيه
ملحوظه: ربنا يستر من النتيجه..انت عارف قصدى طبعا...زى ما قولتلى الناهرده ان مش قلبك اللى اتحرك وانفجر.انت فاهم بقى
اه صحيح..هو انت والحداد(وعد العيون)واخدين بعض عن حب..وياترى ح تلبسوا دبل امتى؟ اصل كلام الناس كتر يا جماعه...انا بهزر طبعا..اختشى يا واد منك له
Gammela el qaseeda awe w very imaginative.
Write more:)
مداح القمر:ربنا يخليك انت الكل فى الكل برده..اما بخصوص الحداد فهو اللى هيرد عليك
شهرزاد
انتى اللى اجمل وشكرا على مروك وتشجيعك ليه
أجمل ما فيها هي واقعيتها الشديدة ، لو الواحد أعد يكتب عن شعوره مش هيكتب أكتر من كده
رائعة
حلوه اوي الحاله دي
حلوه بجد
7elwa aweeeee :)
bas el we7esh en fe3lan el sera3 ben el alb wel 3a2l zad :(
nawart my blog ya sa7er
والمصحف كنت حعيط
موضوعك جامد أوى
مناقشه جامده وبتحصل كتير أوى بين العقل والقلب
للأسف العقل والقلب متناقضين
ومش بيوصلوا لحل سريع
علي رأي واحد اعرفه كويس بيقول
اللي يبيعك بيعه و لازم تكسب فيه كمان ...
انتوك
أفضل أموت بكرامة .. أحسن ما أعيش مذلول
جملة عميقة جدا
قصيدتك حلوة
إلى الأمام
ايه يا راجل الكلام الجامد ده والله روعه روعه
بجد انا عجبنى قوى
الله يفتح عليك بجد
بجد كلمات جميلة جداً...وإحساس أجمل .. أتمنى قراءة المزيد لكـ ..دمت سالماً
معقول!!!! دي روعة
فعلا جميلة
انا و انا بقراها بقيت اقول الله بصوت مسموع و انا مس سهل كلام يعجبني
بس فعلا روعة
---
طنشها و سيبك منها متستهلش
و شد عليها السيفون
دي البنت الخاينة علة و انت متستحملش الجنون
--
:)
رمضان كريم
جميل حالة الحوار الدايرة جوا دى
بس المهم مين اللى هيغلب
انت قلت رأى كل حتة بس اللى هيغلب مين ؟؟؟؟؟؟؟؟
يااااااااااه القصيده ده تحفه مش قادره اقول قد ايه بتعبر عن موفق كنت فيه من شهرين بس للاسف مش باعر فاكتب شعر لكن اكبر دليل على جمال القصيده انها لمست الواقع اللى بنعيشه بس احلى حاجه الواحد يمر بيها بعد الصراع اللى بين العقل والقلب تصالح الاتنين مع بعض ودايما الواحد يقول الاتنين ما نقدر نستغنى عنهم
انا الاول قلت قلب و العقل
نفس الصراع الازلي
لكن بصراحة
انت عبرت عنها حلو اوي و بكلمات جميلة
تحياتي
و كل سنة و انت طيب
sa7era ya sa7er..
dayman 3andna moshkela fel 7ob..ay 7ad..lazem ytasa2l el 2alb wla el 3a2l?!
w kol 7etta fehom bt2ol nafs elkalam ele enta 2olto..waqe3ya bgad..
u honoured my blog ya basha:)
جامدة جدا بجد.. بس نصيحة لو بتحب بجد ودي اول مرة تغلط يبقى سامحها
رق يا عقلى شويه وحن
دنا من غيرها خلاص حجن
هو العقل ديما كده قاسى فى احكامه والقلب غشاء رقيق بيحن على طول والاتنين صح فالصراع دائم والازلى
بجد بوست صاحب معانى بريئه
واعذرنى اذا كنت غير مواظبه على الدخول هنا لأن الكليه شغلانى ديما وكل ماتكون منزل حاجه قولى وانا اجى على طول
فانتازياااااااااااااااااااااا
فانتازياااااااااااااااااااا
تعرف زي ما قولتلك قبل كده انا مش من هواه قرايه القصايد
بس دي بجد حلوة عجبتني اوي يمكن علشان انا بحب الصراع اللي من النوع ده بس انا ف الاخر بشجع العقل بحس ان القلب بيودي ف داهية معرفش ليه
ملحوظة صغيورة :
شكل البلوجر هيبوظلي عادة عدم قراية القصايد-يعني هبقى اقراه قصايد-لان اسلوبكم فعلا حلو وسهل اذا كان انت ولا الدكتور احمد وكمان فانتازيا هانم اللي لقتها فوقي وناس تانية جامدين بيكتبوا حجات حلوة بجد
لا بجد حلوة
اه قولي خلص الموضوع ع ايه مين اللي كسب ؟؟
ايه الجمال بجد والله ده اسلوب خلانى اوصل بتفكيري لابعد من الخيال
حلوة جدا وفيها تلقائية شديدة
فعلا الصراع بين العقل والقلب محير والعقل موجود لحماية القلب من الطعنات
لكن المشكلة ان القلب دائما مايتمرد على نصائح العقل ولايعترف بصحة رأي العقل الا بعد ان يعاني وينزف
مسكين القلب
ولكن في نفس الوقت لاتنسى
اصون كرامتي من قبل حبي
هناك خيط رفيع بين التسامح مع الحبيب والرضا بالدل والهوان
حاول تقرأ في اغراض شعرية كثيرة حتى تزيد من ثروتك اللغوية وتثري تعبيراتك
كل سنة والجميع بخير
الصراع اللى فى الكلام ده حلو جدا
جميله كالعاده يا خالد
عارف اللى بيخلى كتباتك انت والدكتور احمد رائعه انكم بتكتبوا باحساس عالى اوى
احييك
القلب فعلا الواحد مالوش حكم عليه فالقلوب بين يدى الرحمن
ميرسى انك دعيتنى اقرها فعلا حلوة قوى
انا اكيد هكون من المتابعين لك و اتمنى اشوف لك قصايد كتير تانية
تحياتى
اكيد لازم تعجبه لانها حلوه موت
بس كلامك بيقول انك حبيت قبل كده ؟
آه بخصوص الاغنيه انت قلتلي قبل الاخر بشويه احط اللينك ممكن تقول لي الشويهدول كام سطر من الاخر لان الموضوع كبر معايا قوي معلش!!ب
يخرب بيت الفكره
انت بجد ابدعت
وقلت كل حاجه في جمل سهله وبسيطه
حاجه كده زي(احمد فؤاد نجم
انت خليفته يا خليفه
خلاص يا عم اللي علي علي
هه هه هه هه هه هه
قلبنا هو الحياة له لغة واحدة لا يتكلم سواها ولا يعرف غيرها وهي الحب وماتحمله هده اللغة من معاني كالغفران والصفح
أما عقلنا فهو يعرف عدة لغات منها الحكمة وبنقيضها الكبرياء ويعرف الإنصياع وبنقيضه العناد
القلب والعقل مكملان لبعضهما ومدمران بالوقت ذاته فالقلب يهوى والعقل يحكم ونحن ضحايا لكلاهما
الأبيات مذهلة والكلمات رائعة ومعانيها فوق الوصف
فلا تكفيني لغاتي للتعبير ولا تساعدني كلماتي في التفسير
لذالك اعذرني على التقييم فهي أفضل من أن تتصف بجميع الكلمات
تحياتي لك ولكلماتك
ياجماعه الف الف شكر على الكلام الجميل ده
وانا ان شاء الله هرد على كل كومنت فى الموقع بتاع كل واحد
وانا متشكر اوى بجد
ربنا يخليكوا
احييك علي اسلوبك الرائع
واتمني استمر الصداقه الحقيقيه لانها كل شي في الدنيا
احييك علي اسلوبك الرائع
واتمني استمر الصداقه الحقيقيه لانها كل شي في الدنيا
ساحر
جميله ....
انا مقتنعه بالى انت عملته
الكرامه اهم
اولا سورى ع التأخير
بس بجد جميله اوى شفت ان كلنا جوانا اتنين بيتصارعو فى الاخر العقل اللى بيكسب
واللى بيع مرة سهل يبيع مليون
واللى يحب ويهون عليه ويقدر يخدع ويخون يبقى اصلا محبش ولاقلبه كان عاشق مجنون
ارجع ياقلبى لرشدك لحسن تموت مقتول افضل اموت بكرامه ولا اعيش مذلول
بجد جامدة مووووووت
والموت اهون لما الكرامه تهون
:)
bn/يا بخت محمد الحدادا بيها
طب انا مش هترد علياولا ايه؟؟؟؟؟؟؟؟؟
يا بنى انت بجد استاذ بجد انت ملكش حللو بجد ده كلامك واين كان اللى كاتب الكلام ده بجد استاذ بدرجه رئيس قسم بحييك من قلبى يا ساحر بجد سحرتنى اخوك واحد من الناس انت بجد بتتكلم عنى وعن تجربتى هيا والله انا ده هو الانسان اللى انت بتتكلم عنه
ياحازم باشا انا هرد عليك على قهوه توتو
هههههه
فضلت تقول هترد علينا عندنا فين الرد ده يا باشا ؟؟؟
Post a Comment
<< Home