15.7.07

نور الملاك



نور الملاك عمر العيون ماتشوفه
عيونى انا شيفاه وهو بيدارى كسوفه
لو للجمال عنوان اسمك حبيبتى حروفه
خلينى ابص فى عنيكى ادينى دور البطوله
او حتى لمسه ايديكى ترجعنى للطفوله
رديتى عليه بالضحكه..والضحكه منك مقبوله
فى يوم طلبت من القمر اشوف حبيبتى
مالقتش القمر فى السما..اتارى القمره انتى
لما بشوف عينيكى قلبى بيقولى استنى
احنا هنا ع الارض ولا احنا ف الجنه
المهم انك معايه ومش مهم مكانا
بجد انا مش مصدق احساسى فوق الوصف
مالى كده مستسلم وانا بتخطف خطف
هو القلب هيحب كام مره فى عمره
كام واحد فى الدنيا دى يهمك امره
انتى وبس....؟؟؟

39 Comments:

At 8:15 AM, Blogger Hadota ... حدوتة said...

السلام عليكم
احم احم احم انا بما انى اول تعلييييق
هيييييييييييييه
احب اقول ان المدونة جميلة
وكلماتك رائعة واحساسها عالى

كون انك توصف حبيبتك على انها ملاك وانت الوحيد اللى شايف نورهدى فعلا جميلة جدا
اصل الحب دا غير يخليك تشوف فى حبيبك اللى محدش شايفه خااالص

وبعدين دا الحكاية شكلها قالبة معاك بحب بجد .. طبعا ياعم مش بتقول انك عاوز تاخد دور البطولة دا غير مش بيهمك مكانكوا المهم تبقوا مع بعض

اسيبك بقى انت والقمر مع بعض واخلع انا عشان شكلى عزووول

على فكر على فكرة يعنى انا مبحبش الحزن ولا النكد برده فمتخفش المدونة هتاخد شكل جديد
لاحزززززن بعد اليوم
بس ادعيلى اخلص الامتحان بتاع بكرة داعلى خير وانا هروش لكم المدونة

تحياااتى ليك
ولكلماتك ذات الاحساس العالى
واحييك كمان على اختيارك للاغنية التحفة دى

 
At 10:00 AM, Anonymous Anonymous said...

الله على احساس الرائع يا خالد
اية دة يا بني نور الملاك عمر العيون ماتشوفه عيونى انا شايفه وهو بيدارى كسوفه لو للجمال عنوان اسمك حبيبتى حروفة
يااااااة بجد جميلة اوي وبتفكرني بحد جميل اوي

 
At 11:42 AM, Blogger DoOoOoOdY said...

بجد بجد بجد
انت ملك الرومانسيه
جميييييييييله جدااااااا ايه الاحساس الرائع ده
بجد تحفففففففففففففففه

 
At 4:04 PM, Blogger linda said...

فعلا القلب بيحب كم مرة ؟

الحب الحقيقي بيغمرنا مرة وحدة بس بالعمر ولما بيحتوينا بيصير هو كل شيء بنشوف المال بمنظوره هو وبس بعيونه وبس وبنحب بقلب جديد بنحب منغير عقل ولا منطق

الحب جميل جدا ياصديقي

ربنا يوفقك ويكتبلك الخير يارب

 
At 10:24 AM, Blogger tweety said...

حلوه اوى من القلب للقلب

 
At 11:51 AM, Blogger To a friend said...

اولا: احييك علي اختيار اغنية الخلفية .. منتهي الرقة و الجمال

ثانيا: احييك علي تصميم المدونة ..واضح ان في بينا توارد افكار
;)
ثالثا: القصيدة تتميز باحساس جميل .. اكاد اسمع احد المطربين المهمين يغنيها

رابعا: اسمح لي ابعت لك ايمايل فيه شوية نقدصغيرين(علي قدي)لعله يكون مفيد باي شكل

 
At 11:52 AM, Blogger من القلب said...

هو مين فيكم الملاك ؟؟

 
At 12:07 PM, Blogger To a friend said...

اممم بما ان مفيش ايمايل في البروفايل .. ممكن اقولك الكلمتين النقد هنا و لك مطلق الحرية انك تمسحهم بعد كده او تحتفظ بهم

القصيده رائعة و قريبة للقلب و المقدمة هايلة جدا- اول 3 ابيات بالتحديد

جميل انك لا تميل للمبالغة في الكلام عن الحبيبة و لكن ان توصف ضحكتها بأنها مقبولة فاظن انها ممكن تعتبر التعبير ده تقليل او ذم لها و ليس مدحا كما اردت
بعد البداية الجميله و الجديدة بدأت الكلمات تميل لأن تكون "عادية" او مكررة زي "اتاري القمرة انت" – قصدي هنا ان تشبيه الحبيبة بالقمر ليست في روعة تشبيهها بنور القمر
البيت الذي يبدأ ب " بجد انا مش مصدق احساسى فوق الوصف" اعتقد انك تستطيع ان تعطي نفس المعني بالاستغناء عن "بجد" لنها تعطي ايحاء بأن كل ما سبق ليس "بجد" – في وجهة نظري

تنتهي القصيدة الجميلة بعلامات استفهام فهل تسأل الحبيبة ام القاريْ ؟

اخيرا خليني احييك تاني علي كتابتك الهادئة و احساسك الرائع و اختيارك الواعي للكلمات

ارجو اني ماكنش تقلت
تحياتي

 
At 7:45 PM, Blogger semsem said...

الله حلوة جداالكلمات دى
تحياتى ليك على هذا الابداع

 
At 7:08 AM, Blogger Hayam said...

كلامك حلو قوي

 
At 8:52 PM, Blogger رينـــــــــــا said...

هو انت تقصدك ولا تقصدها

 
At 10:33 PM, Blogger break said...

احم
دستور ياللى هنا
انا قلت اخبط قبل ما ادخل لاكون جيت ف وقت مش هوا ولا حاجة
ايه الرومانسية دى كلها
لا جميلة اوى
تسلم ايدك

 
At 5:13 PM, Anonymous Anonymous said...

بص بقى
كلام المجاملات وحلو والله وجميل دا بقى قديم مووووت
انا لو ماكانتش عاجبانى ماكنتش علقتلك عليها
متهيألى كده اريح ولا ايه؟؟؟
بس جامده:P
اه على فكره

حفلة ايامنا الحلوه يوم الجمعه27 يوليو الساعه8:30 بساقية الصاوى..قاعة الحكمه
اكبر تجمع بلوجرى اوعوا يفتكوا
Blogger Radio Station

 
At 7:08 PM, Blogger Unknown said...

الى محبى الفنان الجامد أوى و الأنسان الرائع أوى خالد الصاوى شاركوا مدونة عندليبيات تدعوكم لحضور لحفلها الذى تقيمه بمناسبة مرور عام على مدونة خلود... قيه تورتة ماتخفوش

 
At 3:16 PM, Blogger مداح القمر said...

ايه المفاجأه دى؟اسلبو تانى خالص
اول حاجه فيه الاحساس عالى اوى والكلمات مافيهاش كلمه واحده تقيله او زياده...مش عارف ليه اول ماقريتها قولت انك غلبت ايمن بهجت قمر فى اغنية الليله دى
ايه يابنى دا؟؟انا كدا محرج جدا من نفسى...واثبتلى واثبت لناس كتير انكح تقدر تكتب الرومانسى بكلام رومانسى وتقدر تكتبه بكلام دارج
اهنييك وان شاء الله ح اشوفك الليله دى

 
At 1:06 AM, Blogger أميرة said...

ياسيدى ع الكلام ياملك الرومانسية

جميلة اوى يافنان

ربنا يوفقك

وحشنى كلامك اوى ياريت تعذرنى عشان مش بزورك من زمان

تحياتى

 
At 7:22 PM, Blogger carol 2002 said...

جميل كلامك
والاحساس البرىءالجميل ده
تحياتى

 
At 12:43 PM, Blogger شاب نفسة يحقق حلمة said...

ازيك يا خالد باشا
بجد جميله جدا
بس ليا سؤال انا مش فاهم مين فيكم الملاك

 
At 6:56 PM, Blogger sa'7so'7te said...

elkalemat to7fa begad
we kolo elle ba2olo
en elle eddak yeddena :)

 
At 12:54 AM, Blogger BaSsMa said...

تحفة تحفة تحفة أووي
بجد ياساحر
عجبتني أوي تسلم ايديك

 
At 12:14 PM, Blogger Radwa said...


لا حلوه بجد بس ليه مش بتكتر من الخيال اصلى بحس ان اخيال دا قمة الرومانسيه

 
At 4:03 PM, Blogger rOshe said...

alla 3lek f3ln gamd awe el e7sas da

 
At 12:06 AM, Blogger هبههههووب said...

اذيك يا ساحر
انت هايل
انا بعتذر لك انى اخدت من عندك شعر انت كاتبه ونشرته عندى ف البلوج بتاعى
انا كتباة بأسمك علشان اعطيك حقك
هو كان احساس انا حسيت بيه ومعرفتش اعبر عنه الا لما قريت الكلام دا فنشرته عندى ع البلوج ...لانه كلام جوايا وانت عبرت عنه
اشكرك واعتذر لك

 
At 5:02 PM, Blogger أجدع واحد في الشارع said...

ياباشا

ايه الكلام الجامد ده

احنا مش قدك يا عم خالد

براحة علينا شوية

ربنا يديم عليك الحب وعلينا

 
At 5:24 PM, Blogger نورهان مفيد said...

مش كتير بقف قدام حاجة تخليني عاجزة عن الرد والتعبير
والبوست ده
من الحاجات القليلة دي
بجد أحساس صادق وحب حقيقي خلص من زماااااااااان

 
At 7:10 PM, Blogger واد غلبان said...

iveما شاء الله ايه يا عم الكلام الجامد ده..بس اح احم ...ممكن ترجمه بالعربى بس من غير هزار انت موهبة

 
At 9:16 AM, Blogger rOshe said...

gmdaaaaaaaa gdnnnnnnnnn

 
At 1:33 PM, Blogger رينـــــــــــا said...

السلام عليكم ورحمه الله وبركاته
كل عام وانت اللى الله اقرب وعن المعصيه ابعد ان شاء الله
كل عام وانتم با الف خير

 
At 9:11 PM, Blogger من القلب said...

كل سنة وانت طيب
رمضان كريم

 
At 8:22 PM, Anonymous Anonymous said...

بيان هام جداااااااا
تابعوا أحداث الافطار الرمضانى الجامد جدا مع خالد الصاوى فى الساقيه
والتفاصيل على مدونتى الصغنونه
وماحدش يتأخر

 
At 4:41 PM, Blogger من القلب said...

كل سنة وانت طيب
طال غيابك
يارب تكون بخير

 
At 4:29 PM, Blogger صاحب البوابــة said...

وصف رائع

يحمل نوعاً من اضصفاء الرومانسية الشاعرية على ملامح الحبيب

تحياتي

 
At 1:38 PM, Anonymous Anonymous said...

من أجمل ما قرات في وصف الحبيبة ياريت كل واحد يشوف حبيبته كده ياريت

 
At 11:21 AM, Blogger هبههههووب said...

ايه يا ساحر فينك
مفيش جديد ولا ايه الايام دى
متحرمناش من كتاباتك الحلوة الى بتعبر عن كتير من الى عايزين نقوله وانت الى بتعبر عنه نيابه عنا
اتمنى يكون المانع خير
ربنا يكرمك يارب

 
At 12:11 PM, Anonymous Anonymous said...

ممكن أستغل المساحه دى واعمل اعلان صغير
16 نوفمبريا جماعه..مستنياكو يوم الجمعه الجايه الساعه 8 م..قاعة الحمكمة بساقية الصاوى
هانتقابل ونحضر حفلة لفرقة أيامنا الحلوه..واحده من اكبر التجمعات البلوجرية المهمه
تعالوا وقولوا للحبايب

 
At 3:16 AM, Blogger Mkjwe said...

لالالالالالا الكلام دة كبيررررر كبيرررررر


عجبتني القصيدة دي قصدي القافية دي

مبــــــــدع والله مبدع والمبدعيــن قليلٌ


تحياتي لك من أحشاء قلبي يا معلم

 
At 8:11 PM, Blogger نوري said...

أنت ساحر
وهتفضل طول عمرك الساحر بكتباتك
وأنا دايما بقول كده
وأديك غبت وطولت ولكني أُأكدلك انك هترجعلنا بصدمه ادبيه جديده من بتوعك
طبعا انت مش محتاج اني اقولك ان دي اكتر من رووووووووووووعه
لا نها فعلا اكتر من كده
مستنيه القنبله الي جايه الي اكيد هتبقي اجمل من اجمل حاجه كتبتها
وطبعا(بست وشز فور يو)0

 
At 3:57 PM, Blogger ياسر شمس الدين said...

احساس عالى وكلمات رائعه
تحياتى

 
At 4:49 PM, Blogger هبههههووب said...

انت فين يا ساحر وفين كتاباتك
نستنا ولا ايه
عوووووود

 

Post a Comment

<< Home