13.4.09

كلام العيون



بعيونى وعيونها

قولتلها عجبانى

قالتلى ايه تانى؟

قولتلها عينى منك

قالتلى بدلع بكاش

قولتلها اثبتلك

قالتلى بدلع بكاش

قولتلها هاجى جنبك

قالتلى بدلع بكاش

واقول انى بحبك

ضحكت ماردتشى

وانا نارى كده زادت

تئالت مابصتشى

قولت..والنعمه مالت

ببص..لقتها بصالى

بتقول انى عجبها

قولتلها ايه تانى؟

قالتلى عينى منك

ومحدش هيحوشنى عنك

قولتلها مين انا؟

قالتلى هدوقك الهنا

قولتلها مين انا؟

قالتلى جنتك انا

وجابتلى بسبوسه

وقولتلها ياعروسه

قالتلى وانت العريس

وده كان يوم الخميس
بعيونى وعيونها

6 Comments:

At 10:15 AM, Blogger dramaqueen said...

اول كومنت


هاااااااااااااى
ازيك يا ساحر
فينك من زمان
الغيبة طولت اوى المرة دى

ساحر فى كلماتك واسلوبك
تسلم ايدك

ربنا يديم عليك الفرح

 
At 11:20 PM, Blogger yoyo said...

صباحك سكر
ايه الغيبة الطويلة دى كلها يارب تكون بالف خير يارب

هههههههههههههه عجبتى كلماتك او اوى والله
عبرت فيها عن دلال و دلع الانثى حين تملك بالفعل من تحب
ماشى يا عم خالد ربنا يسهله بقى هنقول ايه هههههههههههه
ماهو كلام العيون دا مش بيكون فيه بعده اى كلام هو بيكفى والله

تحياتى
يويو

 
At 10:18 AM, Blogger media said...

ازيك يا ساحر
حمدلله على السلامه ايه الغيبه الطويله دى
كلاماتك ديما جميله
تحياتى


لبنى

 
At 10:31 PM, Blogger نجمة قمر حبيب و بعيد said...

السلام عليكم
اول مرة اعلق عندك و يا رب التعليق يهمك
أولا : كلامك مش عارفة حاسة انه بكش
ثانيا : لو فضلت على الحال ده على ما اظن ممكن تمسك الراية بعد بيرم التونسى بالعامية بتاعتك ده
ثالثا : و ده المهم موضوع اليمامة احلى
رابعا : ممكن تكلمنا عن الحب المرة الجاية
سلام من نجمة قمر بعيد و حبيب
من نافذة الكمبيوتر

 
At 12:05 AM, Blogger مداح القمر said...

عليا الطلاج بالتلاته جامده جدا..يا بختها ياعم..وانا مع رأى نجمة قمر انت بقيت توزن كتاباتك..لو فضلت كدا وحطيت فى دماغك ممكن تبقى زى على سلامه او بيرم او حتى صلاح جاهين بس لو حطيت ف دماغك..بس انا عارف دماغك وقلبك راحوا فين خلاص..بالتوفيق يا بوب

 
At 12:26 AM, Anonymous Anonymous said...

ياساحر سحرتني

صباحك حب وعطر منساب من بين الحروف

كلمات جميلة ورائعة جداً وأسعدني المرور

من هنا

تحياتي

 

Post a Comment

<< Home